Söguleg stund á St Andrews: Kona tekur við sem fyrirliði R&A í fyrsta sinn

Fallbyssuskot rauf morgunkyrrðina á St Andrews í Skotlandi föstudaginn 25. september þegar Claire Dowling sló upphafshögg sitt á fyrsta teig Old Course. Þar með tók hún formlega við sem fyrirliði (e. Captain) The Royal and Ancient Golf Club of St Andrews, fyrst kvenna í 272 ára sögu klúbbsins.

Athöfnin, sem á ensku kallast „driving in“, er ein elsta hefð golfsins. Nýr fyrirliði slær eitt högg af fyrsta teig á meðan kylfusveinar bíða úti á brautinni og keppast um að ná boltanum. Í þetta sinn var það kylfusveinninn Dillon McCarron sem náði honum og hlaut að launum gullpening með mynd af Karli III. konungi. Boltinn verður síðan steyptur í silfur og varðveittur í klúbbhúsinu.

Margfaldur meistari og reyndur dómari

Dowling er fædd og uppalin í Dublin. Á keppnisferlinum vann hún fimm írsk meistaramót auk breska höggleiksmeistaramóts kvenna í flokki áhugakylfinga. Hún var fyrirliði sameiginlegs liðs Bretlands og Írlands í Curtis-bikarnum árið 2000, þegar liðið tapaði 10–8 fyrir Bandaríkjunum á Ganton-vellinum á Englandi.

Dowling var í hópi fyrstu kvennanna sem fengu aðild að klúbbnum árið 2015. Hún er reyndur dómari, heiðursfélagi í írska kvennagolfsambandinu og er enn með 7,6 í forgjöf.

Embætti með langa sögu

The Royal and Ancient Golf Club of St Andrews var stofnaður árið 1754 og er einn elsti golfklúbbur heims. Fyrirliðinn er valinn til eins árs í senn og gegnir fyrst og fremst heiðurs- og fulltrúahlutverki.

Klúbburinn er ekki það sama og The R&A, sem setur golfreglurnar ásamt bandaríska golfsambandinu og heldur Opna breska meistaramótið. Sagan og nöfnin fléttast þó saman og fáar stöður í golfheiminum þykja virðulegri.