Jarðvinnu við stækkun golfskála Keilis á að ljúka 15. nóvember

Framkvæmdir við stækkun golfskálans á Hvaleyrarvelli eru komnar á fullt skrið, samkvæmt vef Golfklúbbsins Keilis. Jarðvinnu á að ljúka 15. nóvember og þá hefst uppsteypa viðbyggingarinnar. Þegar loka þarf stærri hluta svæðisins verður umferð gangandi og akandi færð norður fyrir skálann. Klúbburinn vinnur jafnframt að beinu streymi af framkvæmdasvæðinu svo félagsmenn geti fylgst með.

Þjónustan í skálanum var þegar skert fyrir veturinn. Verslunin er opin með skrifstofunni kl. 8–16 og veitingasalan kl. 9–15 á virkum dögum. Golfbílar eru ekki leyfðir vegna aðstæðna á vellinum og verður það líklega þannig út tímabilið, en engin áform eru um að loka völlunum.